സെബുന്നീസയുടെ കഥ

ഔറംഗസേബിനു ഒരു പുത്രി ഉണ്ടായിരുന്നു; സെബുന്നീസ.
ഏഴാം വയസ്സിൽ ഖുർആൻ മന:പാഠമാക്കിയ സെബുന്നിസ കവിതകൾ എഴുതാൻ തുടങ്ങി. ഔറംഗസേബ് സെബുന്നിസയെ കവിത എഴുതുന്നതിൽ നിന്നും വിലക്കി. മറ്റു പെണ്ണുങ്ങളെ പോലെ ആയിരുന്നില്ല സെബുന്നിസ . രാജകുമാരിയായിട്ടും ആഭരണങ്ങളോട് പോലും വലിയ താല്പര്യം കാണിച്ചില്ല സെബുന്നിസ. വസ്ത്ര ധാരണത്തിൽ പോലും ലാളിത്യം കാണിച്ചു.
ദൈവ വിശ്വാസത്തിൽ നിന്നും ജനക്ഷേമത്തിൽ നിന്നും അകന്നു നിന്ന് മാർബിൾ കല്ലറകൾ ഉണ്ടാക്കിയവരെ അച്ഛനെന്നോ മകനെന്നോ നോക്കാതെ തുറുങ്കിലടച്ച ഔറംഗസേബിനെ ചരിത്രമെഴുതിയവർക്കാർക്കും ഇഷ്ടമില്ലാത്തത് സ്വാഭാവികം. ഔറംഗസേബ് കണ്ണഞ്ചിപ്പിക്കുന്ന മാളികകൾ പണിതില്ല. മിഥ്യയായ എല്ലാം വെറുത്തു. സ്വന്തം മകളുടെ കവിതയെ പോലും.

സെബുന്നിസയുടെ വിശ്വാസം പോലും ഉപ്പയെ പോലെ ആയിരുന്നില്ല. ഉപ്പ തികഞ്ഞ ഇസ്ലാമിക വിശ്വാസി.ചിലരുടെ ഭാഷയിൽ പറഞ്ഞാൽ ഒരു തരം ഓർത്തോഡോക്സ്.
സെബുന്നീസയുടെ പാത അക്ബറിനെ പോലെ ആയിരുന്നു. ദീനെ ഇലാഹി പോലെ സർവമത സത്യസിദ്ധാന്തം. സെബുന്നീസയുടെ കവിതകളിൽ ജീസസും ഉണ്ടായിരുന്നു സെബുന്നീസ എഴുതി:

"Whether it be in Mecca’s holiest shrine, Or in the Temple pilgrim feet have trod,
Still Thou art mine, Wherever God is worshiped is my God" (ഒറിജിനൽ ടെക്സ്റ്റ് - പേർഷ്യൻ)

വിശ്വാസത്തിൻറെ പേരിലും കവിതകളുടെ പേരിലും പിതാവിനോട് പടവെട്ടി ആയിരുന്നു
സെബുന്നീസ ജീവിച്ചത്. തനിക്കായി കിട്ടിയ സമ്പത്ത് മുഴുവൻ പാവങ്ങള്ക്ക് ദാനം ചെയ്തു സെബുന്നീസ.ഒരിക്കൽ സെബുന്നീസ പൂന്തോട്ടത്തിലൂടെ നടക്കുമ്പോൾ ഇങ്ങനെ പാടി
"നാല് കാര്യങ്ങൾ ഇല്ലാതെ സന്തോഷമില്ല - മദ്യവും പൂക്കളും,ഒഴുകുന്നൊരരുവിയുംപിന്നൊരു പ്രിയതമനും"
അപ്പോൾ ഔറംഗസേബ് അവിടെ നമസ്കരിക്കുന്നത് കണ്ടു. ഉപ്പ കേട്ടോ എന്ന ഭയത്തിൽ സെബുന്നീസ ഇങ്ങനെ മാറ്റിപ്പാടി.
"നാല് കാര്യങ്ങൾ ഇല്ലാതെ സന്തോഷമില്ല. - വ്രതവും പ്രാർഥനയും, കണ്ണീരും പിന്നെ പശ്ചാത്താപവും"

ഒരു പാട് പേർ സെബുന്നീസയെ വധുവാക്കാൻ കൊതിച്ചിരുന്നു. എല്ലാം പ്രശസ്തരായ രാജകുമാരന്മാർ. എന്നാൽ സെബുന്നീസ പിതാവിനോട് ആവശ്യപ്പെട്ടത്, ഞാൻ കല്യാണം കഴിക്കാൻ പോകുന്ന വ്യക്തിയെ എനിക്ക് പരീക്ഷിക്കണം എന്നായിരുന്നു.
പേർഷ്യയിലെ ഷാ അബ്ബാസ് രണ്ടാമൻറെ മകൻ മിർസ്സാ ഫാറൂഖ് അങ്ങനെ ഒരു പരീക്ഷണത്തിന് വിധേയനായി. ഒരിക്കൽ ചക്രവർത്തി അവനെ വിരുന്നിനു വിളിച്ചു. മുഖം മറക്കുന്ന തട്ടവുമിട്ട് അവൾ പൂന്തോട്ടത്തിൽ കാത്തു നിന്നു, .
ഫാറൂഖ് കാവ്യാത്മകമായി അവളോട് ഒരു ചുംബനം ആവശ്യപ്പെട്ടു.
കവിതയിലൂടെ തന്നെ അവൾ മറുപടി പറഞ്ഞു: "നിങ്ങളെന്നോടു അടുക്കളയിലുള്ള വല്ലതും ആവശ്യപ്പെടൂ. തരാം"
സെബുന്നീസ ഔറംഗസേബിനോട് പറഞ്ഞു: "അയാളുടെ സൗന്ദര്യവും പ്രതാപവും ഒക്കെ എനിക്കിഷ്ടപ്പെട്ടു. പക്ഷെ, അയാളെ എനിക്കിഷ്ടപ്പെട്ടില്ല".

ഔറംഗസേബും സെബുന്നീസയും ഒരിക്കലും ഒത്തു പോയില്ല.20 വർഷത്തോളം സെബുന്നീസയെ
പിതാവ് ഒരു കോട്ടയിൽ തടവിലിട്ടു.
സെബുന്നീസ ഒരിക്കൽ പാടി,
"ഞാനൊരു മുസ്ലിമല്ല. ഞാനൊരു വിഗ്രഹാരാധകയാണ്.
എൻറെ സ്നേഹമെന്ന വിഗ്രഹത്തിന് മുന്നിലാണ് ഞാൻ തല കുനിക്കുന്നത്".

സെബുന്നീസ മരണപ്പെട്ടപ്പോൾ ഔറംഗസേബിനു കരച്ചിലടക്കാൻ കഴിഞ്ഞില്ല. അതിയായ ദുഖിതനായി കാണപ്പെട്ടു. ഒരേ വഴിയിലേക്ക് പുറപ്പെട്ടവരായിരുന്നു ആ ഉപ്പയും മോളും. അവരുടെ പാതകൾവ്യത്യസ്തമായിരുന്നു..ഔറംഗസേബിനെ ചരിത്രമെഴുതിയവർ പരാജയപ്പെടുത്തിക്കളഞ്ഞുവെങ്കിൽ, സെബുന്നീസയെ ഔറംഗസേബ് പരാജയപ്പെടുത്തിക്കളഞ്ഞു. എങ്കിലും ഇരുവരും പകുതി വിജയിച്ചവരാണ്. ഔറംഗസേബ് പരാജിതനായ പകുതിയിൽ സെബുന്നീസയും സെബുന്നിസ പരാജയപ്പെട്ടിടത്ത് ഔറംഗസെബും വിജയിച്ചു.

"ഞാനൊരു രാജപുത്രി.എൻറെ പാത ബഹിഷ്കരണത്തിൻറെ പാതയാണ്.ഇതാണെൻറെ തിലകം.ഞാൻ സെബുന്നീസയാണ്. എൻറെ പേരിനർഥം പോലെ സ്ത്രീ സമൂഹത്തിൻറെ തിലകമാണ് ഞാൻ"