ഒരുമിച്ചു കണ്ട സ്വപ്‌നങ്ങൾ..

ദാസനും വിജയനും കണ്ട പോലെ, അൽഫോൻസും കൂട്ടരും കണ്ട പോലെ, വിനീതും 'ശിങ്കിടി'കളും ഇപ്പോൾ കണ്ട് കൊണ്ടിരിക്കുന്ന പോലെ ഒരു ഡ്രീം ഷെയറിങ് കഥ ഹോളിവുഡിനും പറയാനുണ്ട്. 

ബെന്നും കേസിയും സഹോദരന്മാരാണ്. സഹോദര ബന്ധത്തേക്കാൾ സുദൃഢമായ ഒരു സുഹൃത് ബന്ധം അവർക്കിടയിൽ എന്നെന്നും നില നിർത്തിയത് മാറ്റ് എന്ന സുഹൃത്തായിരുന്നു . 

മസാച്യുസെറ്റ്സിലെ സ്‌കൂൾകാലഘട്ടം മുതൽ മൂവരും ഒരുമിച്ചായിരുന്നു. ലോസാഞ്ചലസിൽ ഒരു കൊച്ചു മുറിയെടുത്തു സിനിമാ സ്വപ്നങ്ങളുമായി ഊരു തെണ്ടിയപ്പോഴും,ലോസാഞ്ചലസിൽ നിന്ന് ഹോളിവുഡിലേക്ക് ചേക്കേറിയപ്പോഴും കാത്ത സൗഹൃദം മൂന്നു പേരെയും എത്തിച്ചത് സിനിമാ ലോകത്തിൻറെ നെറുകയിലേക്കായിരുന്നു. ഇത്രയും ക്രിയാത്മകമായ ഒരു സൗഹൃദ ബന്ധം ഹോളിവുഡിൽ വേറെയില്ല.

1997 ഇൽ 'ഗുഡ് വിൽ ഹണ്ടിങ്' എന്ന സിനിമ ഒരുമിച്ചെഴുതിയ ബെന്നും മാറ്റും അക്കൊല്ലത്തെ ഓസ്‌കർ ആണ് നേടിയെടുത്തത്. മൂവരും അതിൽ ഒരുമിച്ചഭിനയിക്കുകയും ചെയ്തു.
2007 ഇൽ ഏറെ ശ്രദ്ധേയമായ 'ഗോൺ ബേബി ഗോൺ' ബെൻ സംവിധാനം ചെയ്തപ്പോൾ സഹോദരൻ കേസി നായകനായി.
രചിച്ച ചരിത്രങ്ങളിലെല്ലാം ഒരുമിച്ചു കൈവെച്ച് അപൂർവതകൾ തീർത്തപ്പോൾ ഓരോരുത്തരും നേടിയെടുത്ത അംഗീകാരങ്ങൾ അനവധി. എഴുത്തുകാരൻ, സംവിധായകൻ, നടൻ, സഹനടൻ.. ഏറ്റെടുത്ത റോളുകൾ എല്ലാം പൊന്നാക്കാൻ സാധിക്കുമെന്ന് ലോസാഞ്ചലസിൽ നിന്നും വണ്ടി കേറിയപ്പോൾ ഇവർ ഓർത്തു കാണുമോ!

മൂവരും കൂടി നേടിയെടുത്തത് 149 വ്യത്യസ്ത അവാർഡുകൾ!
296 തവണ വ്യത്യസ്ത അവാർഡുകളിലേക്കു നോമിനേഷനുകൾ!
രണ്ടു തവണ ഓസ്കർ നോമിനേഷൻ ലഭിച്ച ബെൻ അതിൽ രണ്ടു തവണയും ഓസ്കർ നേടി!
മാറ്റ് ഒരു തവണ ഓസ്‌കാർ നേടുകയും 4 തവണ നോമിനേറ്റ് ചെയ്യപ്പെടുകയും ചെയ്തു

രണ്ടു തവണ നോമിനേറ്റ് ചെയ്യപ്പെട്ട കേസി ഇത് വരെ ഓസ്‌കാർ നേടിയിട്ടില്ല.
എന്നാൽ ഇത്തവണ ബെന്നും മാറ്റും പ്രതീക്ഷയിലാണ്..
നാളെ ഒരു പക്ഷെ മൂവരും കണ്ട സ്വപ്‌നങ്ങൾ ഒരു പക്ഷെ കേസിയിലൂടെ പൂർണതയിൽ എത്തിയേക്കാം...

കേസിയുടെ കൂടെ ഓസ്‌കാർ നിശയിൽ മധുരം പങ്കു വെക്കാൻ മാറ്റ് കൂടി ഉണ്ടായേക്കും. കേസി അഭിനയിച്ച 'മാഞ്ചസ്റ്റർ ബൈ ദി സീ' യുടെ നിർമാതാവ് വേറെ ഒരാൾ ആയെങ്കിൽ അല്ലെ അത്ഭുതമുള്ളൂ..

സിനിമാ ലോകത്തെ അത്ഭുതപ്പെടുത്തി കൊണ്ട് ഈ ക്രിയാത്മക സൗഹൃദം മുന്നോട്ട്..

-- Saneen Bin Nasrullah -

(ഇതെഴുതിയതിന്റെ പിറ്റേന്ന് കെയ്സിയും നേടി ഓസ്കാർ)